अज्ञात वाहनाच्या धडकेने कामरगाव मध्ये बिबट्या ठार

नगर संवाद  कामरगाव (ता. अहिल्यानगर) येथे अहिल्यानगर पुणे महामार्गावर सकाळी ६.०० वाजण्याच्या सुमारास अज्ञात वाहनाने धडक द...

नगर संवाद 

कामरगाव (ता. अहिल्यानगर) येथे अहिल्यानगर पुणे महामार्गावर सकाळी ६.०० वाजण्याच्या सुमारास अज्ञात वाहनाने धडक दिल्याने नर जातीचा बिबट्या गंभीर जखमी झाला.  बराच काळ तो बिबट्या गंभीर जखमी अवस्थेत रस्त्यावर पडून होता. अखेर त्याचा मृत्यू झाला 

कामरगाव शिवारातील काळ्याच्या डोंगराकडून नगर पुणे महामार्गावर रस्ता ओलांडत असताना अज्ञात वाहनाचा धक्का लागून बिबट्या गंभीर जखमी झाला होता. त्या अवस्थेत तो रस्ता पार करून रस्त्याच्या कडेला निपचित पडला. ही माहिती नवनाथ ठोकळ आणि सामाजिक कार्यकर्ते तुकाराम कातोरे यांनी तत्काळ वन विभागाच्या अधिकाऱ्यांना कळविली. त्यानुसार वन परिक्षेत्र अधिकारी अविनाथ तेलोरे यांच्या मार्गदर्शनाखाली वनपाल शैलेश बडदे वनरक्षक कृष्णा गायकवाड वन कर्मचारी हे घटनास्थळी दाखल झाले. त्यांनी पंचनामा करून बिबट्याला ताब्यात घेतले व पुढील कार्यवाही साठी वन परिक्षेत्र अधिकारी यांच्या कार्यालयाकडे सुपूर्द केले .   

यावेळी अहिल्यानगर पुणे महामार्गावरून जाणाऱ्या येणाऱ्या वाहन चालकांनी वाहने थांबून मोठी गर्दी केली होती. अनेक लोक त्याचे व्हिडिओ काढत होते. भल्या सकाळी व्हिडिओ व्हायरल होताच त्या ठिकाणी बघ्यांची मोठी गर्दी झाली होती.